ഇന്ത്യൻ സൂപ്പർ ലീഗിലെ മലയാളി സൂപ്പർ താരമായ അനസ് എടത്തൊടികയെ സ്വന്തമാക്കാൻ കേരളാ ബ്ലാസ്റ്റേഴ്സ് ഉൾപ്പെടെ മൂന്ന് ക്ലബ്ബുകൾ പിന്നാലെയെന്ന് റിപ്പോർട്ട്. വൻ തുകയാണ് മൂന്ന് ടീമുകളും അനസിനെ ടീമിലെത്തിക്കാൻ ഓഫർ ചെയ്തതെന്നാണ് സൂചന. പരിക്കിനെത്തുടർന്ന് ഈ സീസൺ ഐ എസ് എല്ലിലെ ഭൂരിഭാഗം മത്സരങ്ങളും നഷ്ടമായെങ്കിലും അടുത്ത സീസണിലും വൻ തുക അനസിന് ലഭിക്കും എന്നത് ഏകദേശം ഉറപ്പായിട്ടുണ്ട്.
കേരളാ ബ്ലാസ്റ്റേഴ്സ്, എടികെ എന്നീ ടീമുകൾ അനസുമായി പുതിയ കരാറിലേർപ്പെടാൻ ശ്രമിക്കുമ്പോൾ നിലവിൽ അനസിന്റെ ടീമായ ജംഷദ്പൂർ എഫ് സി താരവുമായുള്ള കരാർ നീട്ടാൻ താല്പര്യപ്പെടുന്നു. കേരളാ ബ്ലാസ്റ്റേഴ്സ് പരിശീലകൻ ഡേവിഡ് ജെയിംസിന്റെ പ്രത്യേക താല്പര്യപ്രകാരമാണ് അനസിനെ ടീമിലെത്തിക്കാൻ മാനേജ്മെന്റ് ശ്രമിക്കുന്നത്. അനസിന്റെ കളിയിൽ ആകൃഷ്ടനായ ജെയിംസ്, രണ്ട് വർഷത്തെ കരാറിൽ താരത്തെ ടീമിലെത്തിക്കാനാണ് മാനേജ്മെന്റിനോട് ആവശ്യപ്പെട്ടിരിക്കുന്നത്.ജിങ്കൻ – ലാൽ റുവാത്താര – അനസ് എന്നിവരുൾപ്പെടുന്ന പ്രതിരോധ സംഘമാണ് അടുത്ത സീസണിൽ ജെയിംസിന്റെ മനസിലുള്ളത്.
നിലവിൽ ഇന്ത്യൻ ദേശീയ പരിശീലകൻ സ്റ്റീഫൻ കോൺസ്റ്റന്റൈന്റെ പ്രിയപ്പെട്ട പ്രതിരോധ ഭടനാണ് അനസ്. സെന്റർ ബാക്ക് പൊസിഷനിൽ ടീം ഇന്ത്യയുടെ വിശ്വസ്തനായ അനസ് മുൻ സീസൺ ഐ എസ് എല്ലുകളിലും മികച്ച പ്രകടനമാണ് കാഴ്ച വെച്ചിട്ടുള്ളത്. 31 കാരനായ അനസ് ഡെൽഹി ഡൈനാമോസ്, മോഹൻ ബഗാൻ എന്നീ ടീമുകൾക്ക് വേണ്ടിയും മുൻപ് കളിച്ചിട്ടുണ്ട്.
No comments:
Post a Comment