ഐ സി സി റാങ്കിങ്. കുതിച്ചുയർന്ന് സുന്ദർ

നിഹാദാസ് ട്രോഫിയിലെ കിടിലൻ വിജയം ഇന്ത്യൻ താരങ്ങൾക്ക് നേടി കൊടുത്തത് പോയിന്റ് പട്ടികയിലെ വൻ കുതിപ്പ്. ബൗളർമാരുടെ പട്ടികയിൽ യുസ്വേന്ദ്ര ചാഹൽ രണ്ടാം സ്ഥാനത്തേക്ക് മുന്നേറി. വാഷിംഗ്ടൺ സുന്ദർ 31ാം സ്ഥാനത്തേക്ക് കുതിച്ച് കയറി. 151 സ്ഥാനങ്ങൾ മെച്ചപ്പെടുത്തിയാണ് റോക്കറ്റ് പോലെ സുന്ദർ 31ലേക്ക് എത്തിയത്

പരമ്പരയിലെ മാൻ ഓഫ് സിരീസായിരുന്നു വാഷിംഗ്ടൺ സുന്ദർ. 496 പോയിന്റാണ് സുന്ദറിനിപ്പോൾ ഉള്ളത്. കരിയറിലെ ഏറ്റവും ഉയർന്ന പോയിന്റാണ് ചാഹലിന് ലഭിച്ചിരിക്കുന്നത്. 706 പോയിന്റാണ് ചാഹലിനുള്ളത്.

നിദാഹാസ് ട്രോഫിയിൽ അഞ്ച് മത്സരങ്ങളിൽ നിന്നായി എട്ട് വിക്കറ്റാണ് സുന്ദർ നേടിയത്. ഓരോവറിലെ ശരാശരി 5.75ആണ്. ഇതാണ് സുന്ദറിന്റെ കുതിപ്പിന് വേഗം വർധിപ്പിച്ചത്. അഞ്ച് മത്സരങ്ങൾ കളിച്ച ചാഹലും എട്ട് വിക്കറ്റ് സ്വന്തമാക്കിയിരുന്നു

ബാറ്റ്‌സ്മാൻമാരിൽ ദിനേശ് കാർത്തിക്കും വൻ കുതിപ്പാണ് നടത്തിയത്. 126ാം സ്ഥാനത്തായിരുന്ന കാർത്തിക് ഇപ്പോൾ 95ാം സ്ഥാനത്തേക്കുയർന്നു. 31 സ്ഥാനങ്ങളാണ് കാർത്തിക് മുന്നേറിയത്. കരിയറിലെ തന്നെ ഏറ്റവും ഉയർന്ന പോയിന്റായ 246 കാർത്തിക് സ്വന്തമാക്കുകയും ചെയ്തു

ശിഖർ ധവാൻ, മനീഷ് പാണ്ഡെ, ലങ്കയുടെ കുസാൽ പെരേര, കുശാൻ മെൻഡിസ്, ബംഗ്ലാ താരം മുഷ്ഫിഖർ റഹീം എന്നിവരും പോയിന്റ് പട്ടികയിൽ കുതിപ്പ് നടത്തി. ബൗളർമാരിയിൽ ജയദേവ് ഉനദ്കട്ട്, ഷാർദൂൽ താക്കൂർ എന്നിവരും കരയറിലെ ബെസ്റ്റ് പോയിന്റ് നേട്ടത്തിലെത്തി. ഉനദ്കട്ടിന് 435 പോയിന്റുമായി 52ാം സ്ഥാനത്താണ്. താക്കൂർ 358 പോയിന്റുമായി 76ാം സ്ഥാനത്തുമെത്തി