ഇന്ത്യന്‍ സൂപ്പര്‍ ലീഗിലെ അഞ്ചാം സീസണിലേക്ക് എത്തുമ്ബോള്‍ ടീമുകള്‍ എല്ലാം തന്നെ കടുത്ത പരിശീലനത്തിലാണ്. ആരാധകരുടെ ഇഷ്ട ക്ലബ്ബ് കേരള ബ്ലാസ്റ്റേഴ്‌സാണ് ഒരുക്കങ്ങളില്‍ ഒരുപടി മുന്നില്‍. പ്രീ സീസണ്‍ മത്സരങ്ങളുടെ ഒന്നാം ഘട്ടം പൂര്‍ത്തിയാക്കിയ ടീം അഹമ്മദാബാദില്‍ പരിശീലനം ആരംഭിച്ചു കഴിഞ്ഞു. ബ്ലാസ്റ്റേഴ്സ് ക്യാമ്ബ് പൂര്‍ണമായി ഉണര്‍ന്നതിന്റെ തെളിവാണ് ട്വിറ്ററില്‍ വരുന്ന താരങ്ങളുടെ പോസ്റ്റുകള്‍. ബ്ലാസ്റ്റേഴ്സ് ക്യാപ്റ്റന്‍ സന്ദേശ് ജിങ്കനും മലയാളി താരം സി കെ വിനീതുമാണ് അഹമ്മദാബാദില്‍ പരിശീലനം ആരംഭിച്ച കാര്യം ആരാധകരെ അറിയിച്ചത്. നേരത്തെ കൊച്ചിയില്‍ നടത്താനിരുന്ന പരിശീലന ക്യാമ്ബ് പ്രളയം കണക്കിലെടുത്ത് അഹമ്മദാബാദിലേക്ക് മാറ്റുകയായിരുന്നു. സുരക്ഷയും സാങ്കേതിക കാര്യങ്ങളും മുന്‍ നിര്‍ത്തിയാണ് ക്യാമ്ബ് വേദി മാറ്റാന്‍ അധികൃതര്‍ തീരുമാനിച്ചത്. അഹമ്മദാബാദിലെ ട്രാന്‍സ്സ്റ്റേഡിയയിലാണ് ബ്ലാസ്റ്റേഴ്സ് പരിശീലനം നടത്തുന്നത്. ബ്ലാസ്റ്റേഴ്സ് നിരയിലെ അവസാന വിദേശ താരവും കഴിഞ്ഞ ദിവസം എത്തിയിരുന്നു. സെര്‍ബിയന്‍ താരം നിക്കോള ക്രമരാവിച്ചാണ് ഏറ്റവും ഒടുവില്‍ ടീമിലെത്തിയത്. ജിറോണ എഫ് സി, മെല്‍ബണ്‍ സിറ്റി എഫ് സി തുടങ്ങിയ ലോക ക്ലബ്ബുകളുമായി പ്രീ സീസണ്‍ മത്സരങ്ങള്‍ കളിച്ച ബ്ലാസ്റ്റേഴ്സ് അഹമ്മദാബാദിലെ പരിശീലനത്തിന് ശേഷം കൂടുതല്‍ സൗഹൃദ മത്സരങ്ങള്‍ക്കായി തായ്ലന്‍ഡിലേക്ക് തിരിക്കുമെന്നും വാര്‍ത്തകള്‍ ഉണ്ട്.
