ഈ സീസണ് ഐ എസ് എല്ലില് കേരളബ്ലാസ്റ്റേഴ്സിനൊപ്പമുള്ളത് കരുത്തുറ്റ യുവനിരയാണെന്നും സീസണില് മുന്നോട്ട് പോകാന് ബ്ലാസ്റ്റേഴ്സിനെ ഇത് സഹായിക്കുമെന്നും മുന് ഇന്ത്യന് താരം എന്.പി പ്രദീപ്. കഴിഞ്ഞ ദിവസം ഗോള് ഡോട്ട്കോമിനോട് സംസാരിക്കവെ യായിരുന്നു ബ്ലാസ്റ്റേഴ്സിനെക്കുറിച്ചും, ടീമിലെ യുവനിരയെക്കുറിച്ചും പ്രദീപ് മനസ് തുറന്നത്.
" ബ്ലാസ്റ്റേഴ്സിന് ഈ സീസണില് മികച്ച പ്രകടനം പുറത്തെടുക്കാന് കഴിയുമെന്നാണ് താന് വിശ്വസിക്കുന്നത്. ഇതിന് പ്രധാന കാരണം അവരുടെ മികച്ച യുവനിര തന്നെയാണ്. ഫിന്ലാന്ഡില് പരിശീലനത്തിന് അവസരം ലഭിച്ച പ്രശാന്തിനെപ്പോലുള്ള യുവതാരങ്ങള്ക്ക് ഇത്തവണ കൂടുതല് സമയം കളിക്കാന് അവസരം ലഭിക്കും.
ധാരാളം മികച്ച യുവതാരങ്ങളാണ് ഇത്തവണ ബ്ലാസ്റ്റേഴ്സിനൊപ്പമുള്ളത്, പ്രത്യേകിച്ചും ഇന്ത്യന് താരങ്ങള്. ടീമിന്റെ പ്രതിരോധവും ശക്തം". പ്രദീപ് പറഞ്ഞുനിര്ത്തി.
അതേ സമയം മുന് സീസണുകളിലേതില് നിന്ന് വ്യത്യസ്തമായി കൂടുതല് യുവതാരങ്ങളും, കേരള താരങ്ങളുമടങ്ങുന്നതാണ് ഇത്തവണത്തെ ബ്ലാസ്റ്റേഴ്സ് ടീം. കഴിഞ്ഞ സീസണില് ടീമിലുണ്ടായിരുന്ന കെ. പ്രശാന്തിന് പുറമേ, കേരളാ സന്തോഷ് ട്രോഫി ടീമംഗങ്ങളായിരുന്ന അഫ്ദാലും, ജിതിന് എം എസുമെല്ലാം ഇത്തവണ ബ്ലാസ്റ്റേഴ്സിലെത്തിയിട്ടുണ്ട്.