കഴിഞ്ഞ സീസണിൽ ഗോകുലം കേരള എഫ്സിക്ക് വേണ്ടി മികച്ച പ്രകടനം കാഴ്ച വെച്ച പ്രതിരോധ താരം പ്രൊവത് ലാക്രയെ ടീമിലെത്തിക്കാൻ ഐ എസ് എൽ ടീമായ നോർത്ത് ഈസ്റ്റ് യുണൈറ്റഡ് രംഗത്ത്. കൽക്കട്ട പ്രീമിയർ ഡിവിഷൻ ക്ലബ്ബായ പതചക്രയിൽ നിന്ന് ലോണടിസ്ഥാനത്തിലാണ് ലാക്ര കഴിഞ്ഞ സീസണിൽ ഗോകുലത്തിലെത്തിയത്. ലാക്രയെ സ്വന്തമാക്കാൻ എട്ട് ലക്ഷം രൂപയാണ് നോർത്ത് ഈസ്റ്റ് യുണൈറ്റഡ് മുന്നോട്ട് വെക്കുന്നത്. എന്നാൽ പതചക്ര ഇക്കാര്യത്തിൽ അഭിപ്രായമൊന്നും വ്യക്തമാക്കിയിട്ടില്ല. 2020 വരെയാണ് ലാക്രയ്ക്ക് പതചക്രയുമായി കരാറുള്ളത്.
ഇരുപതുകാരനായ ഈ ലെഫ്റ്റ് ബാക്ക് താരം കഴിഞ്ഞ സീസണിൽ ലോണടിസ്ഥാനത്തിലാണ് ഗോകുലം കേരളാ എഫ്സിയിലെത്തുന്നത്. ഐലീഗിലെ പുതുമുഖങ്ങളായ ഗോകുലത്തിന് വേണ്ടി തകർപ്പൻ പ്രകടനമാണ് ലാക്ര സീസണിൽ കാഴ്ച വെച്ചത്. 15 മത്സരങ്ങളിൽ ടീമിന്റെ പ്രതിരോധനിര കാത്ത താരം ടീമിന്റെ വിശ്വസ്തനായി മാറിയത് വളരെ പെട്ടെന്നായിരുന്നു.
അതേ സമയം കഴിഞ്ഞ സീസണിൽ തകർന്നടിഞ്ഞ നോർത്ത് ഈസ്റ്റ് യുണൈറ്റഡ്, തങ്ങളുടെ ടീമിനെ അടിമുടി മാറ്റുന്നതിന്റെ ഭാഗമായിട്ടാണ് ലാക്രയെ ടീമിലെത്തിക്കാൻ ശ്രമിക്കുന്നത്. ഐ എസ് എല്ലിൽ അവസാന‌സ്ഥാനക്കാരായി ഫിനിഷ് ചെയ്ത നാലാം സീസണിൽ 27 ഗോളുകളാണ് നോർത്ത് ഈസ്റ്റ് പ്രതിരോധം വഴങ്ങിയത്. ലാക്രയെ ടീമിലെത്തിക്കുന്നത് വഴി ടീമിന്റെ പ്രതിരോധ കരുത്ത് വർധിപ്പിക്കാൻ കഴിയുമെന്നാണ് അവരുടെ പ്രതീക്ഷ.
No comments:
Post a Comment