കേരള പ്രീമിയര്‍ ലീഗ് സെമിയിലെ ആദ്യ സ്ഥാനം എഫ് സി തൃശ്ശൂര്‍ ഉറപ്പിച്ചു. ഇന്ന് കൊച്ചി പനമ്ബിള്ളി നഗര്‍ ഗ്രൗണ്ടില്‍ നടന്ന മത്സരത്തില്‍ കേരള ബ്ലാസ്റ്റേഴ്സിനെ തോല്‍പ്പിച്ചതോടെയാണ് തൃശ്ശൂര്‍ സെമി ഫൈനല്‍ യോഗ്യത നേടിയത്. ഒരു ഗോളിന് പിറകില്‍ പോയ ശേഷം മൂന്നു ഗോളുകള്‍ തിരിച്ചടിച്ചായിരുന്നു എഫ് സി തൃശ്ശൂരിന്റെ വിജയം. ലീഗിലെ ആദ്യ മത്സരത്തില്‍ ഇരുവരും ഏറ്റുമുട്ടിയപ്പോഴും ഇതേപോലെ ഒരു തിരിച്ചുവരവ് തന്നെ എഫ് സി തൃശ്ശൂര്‍ നടത്തിയിരുന്നു. അന്നും 2-1ന്റെ ജയം ജാലിയുടെ എഫ് സി തൃശ്ശൂരിനായിരുന്നു.
ഇന്ന് തുടക്കത്തില്‍ ലോകന്‍ മീതെ നേടിയ ഗോളിലൂടെയാണ് ബ്ലാസ്റ്റേഴ്സ് ലീഡെടുത്തത്. ആദ്യം എഫ് സി തൃശ്ശൂര്‍ പതറിയെങ്കിലും പിന്നീട് മികച്ച രീതിയില്‍ തൃശ്ശൂര്‍ തിരിച്ചടിച്ചു. ആദ്യ പകുതി അവസാനിക്കും മുമ്ബ് ഹാരിസാണ് തൃശ്ശൂരിന് സമനില ഗോള്‍ നേടിക്കൊടുത്തത്. രണ്ടാം പകുതിയില്‍ ഒരു റീബൗണ്ടില്‍ നിന്ന് സഫ്വാനാണ് തൃശ്ശൂരിന് ലീഡ് നേടിക്കൊടുത്തത്. സഫ്വാന്‍ തന്നെ തൃശ്ശൂരിന്റെ ജയവും സെമി യോഗ്യതയും ഉറപ്പിച്ച മൂന്നാം ഗോളും നേടി. അവസാന നിമിഷങ്ങളില്‍ ബ്ലാസ്റ്റേഴ്സിന്റെ അഭിജിതിന് ചുവപ്പും കൂടെ കിട്ടിയതോടെ ബ്ലാസ്റ്റേഴ്സിന്റെ പൊരുതലും അവസാനിച്ചു.
ലീഗില്‍ ഏഴു മത്സരങ്ങള്‍ കളിച്ച തൃശ്ശൂരിന്റെ ആറാം ജയമാണിത്. ആറു ജയവും ഒരു സമനിലയുമായി 19 പോയന്റായി എഫ് സി തൃശ്ശൂരിനിപ്പോള്‍. ഇതോടെ ഒരു മത്സരം ശേഷിക്കെ തന്നെ എഫ് സി തൃശ്ശൂര്‍ സെമി ഉറപ്പിച്ചു. ഇനി സാറ്റ് തിരൂരിന് മാത്രമെ തൃശ്ശൂരിനെ പോയന്റ് ടേബിളില്‍ മറികടക്കാന്‍ കഴിയൂ. കഴിഞ്ഞ തവണ ഫൈനല്‍ വരെ കുതിച്ച ടീമാണ് ജാലിയുടെ എഫ് സി തൃശ്ശൂര്‍.
രണ്ട് മത്സരങ്ങളില്‍ രണ്ടും പരാജയപ്പെട്ടു എങ്കിലും ബ്ലാസ്റ്റേഴ്സിന് ഇപ്പോഴും സെമി പ്രതീക്ഷയുണ്ട്.
No comments:
Post a Comment